КАРА-КӨЛ ШААРЫНДА 32 БАТИРЛҮҮ ҮЙ ПАЙДАЛАНУУГА БЕРИЛДИ

Бүгүн, 5- ноябрь Кара-Көл шаарында 32 жаңы батирдин курулушу бүткөрүлүп, ачылыш аземине КРнын Президентинин Жалал-Абад облусундагы ыйгарым укуктуу өкүлү Тилек Текебаев , шаардын мэри Нуртилек Орозбаев , шаардагы мекеме-ишканалардын жетекчилери, аксакалдар, тургундар катышты.

Аталган үй Мамасалы Сабиров атындагы көчөдө жайгашып, 4 кабаттан, 32 батирден турат. Үйдүн курулушуна жергиликтүү бюджеттен 50 миллион сом каражат сарпталды. Мүмкүнчүлүгү чектелген жарандар жана турак жайга муктаж тургундар жаңы үйдүн ачкычын алышты.

Жаңы конушка ээ болгон тургундардын кубанычтарында чек жок.

Ошондой эле 2024- жылдын 13- августунда М. Сабиров көчөсүндөгү №85 жыгач тибиндеги эки кабаттуу 16 батир үй 100% толук күйүп кеткен.Аталган үйдүн ээлери кырсыктан турак үйсүз калган. Ошол үйдөн үйгө муктаж 15 тургунга дагы аталган үйдөн батирлер берилди.

Жагымдуу саамалыкка катышкан шаардын мэри Нуртилек Орозбаев жана Президенттин Жалал-Абад облусундагы өкүлү Тилек Текебаев калктын көйгөйүн чечүү негизги милдеттер экендигин белгилешип," Ак ордоңуздар ак жолтой болсун "-деген каалоо тилектерин билдиришти.