1962-жылы Кара-Көл шаарчасы (поселок) негизделгенден кийин, жергиликтүү бийлик катары поселкалык совет түзүлгөн. Поссоветтин  биринчи төрагасы болуп Каипов Бекташ дайындалган. 

Ал эми 1965 жылдан 1977-  жылга чейин Кара-Көл поселоктук советинин аткаруу комитетинин төрагасы болуп Масиров Камчыбек шайланган жана көрсөтүлгөн ишенимди абийирдүүлүк менен аткарып жемиштүү иштеген. 

1977-жылдын 7-январындагы Кыргыз ССРинин Жогорку Кеңешинин Президиумунун Указы менен поселок областка баш ийген шаар болуп статусу өзгөрүлөт. Шаардын статусун алганга байланыштуу Кыргыз ССРинин Жогорку Советинин Президиумунун 1977-жылдын 7-январындагы №1279-1Х  Токтому чыгып, Кара-Көл шаарында жайгашкан шайлоо округдары боюнча шайланган Таш-Көмур шаардык советинин депутаттары кезектеги шайлоо өткөнгө чейин депутаттардын Кара-Көл шаардык советинин депутаттары болуп эсептелип, шайлоочуларынын өкүлү болушкан. Ошол эле жылдын 27-апрелинде  1-чакырылыштагы шаардык советтин депутаттарынын биринчи уюштуруу сессиясы өтүп, шаардык советтин аткаруу комитетинин төрайымы болуп Абдысаматова Роба Насыровна шайланган.

Абдысаматова Р.Н.  аткаруу комитетинин төрайымы катары шаардын өнүп-өсүшүнө көп салым кошкон. Роба Насыровнанын принципиалдуулугу, тырышчаактыгы менен шаарда көп социалдык объектилер курулган: маданият үйү, оорукана, жолдор, тротуарлар оңдолуп салынган. 

1980-жылдын ноябрь айында Роба Насыровнанын партиялык ишке өткөндүгүнө байланыштуу шаардык советтин аткаруу комитетинин төрагасы болуп Паньков Александр Иванович шайланган. 

1987-жылы А.И.Паньковдун башка жумушка которулгандыгына байланыштуу шаардык советтин аткаруу комитетинин төрагасы болуп Абдыкалыков Орозмат шайланып, 1990-жылдын июль айынан партиянын шаардык комитетинин биринчи катчысы болуп башка кызматка которулган.

1990-жылдын июль айынан 1992-жылга чейин шаардык советтин аткаруу комитетинин төрагасы болуп Масиров Кошбай Масирович шайланган. 

Советтер Союзунун таркашы менен, Кыргыз Республикасы эгемендүү мамлекет катары мамлекеттик башкаруу системасын өзгөртүп,  аткаруу комитетинин ордуна 1992-жылдан мамлекеттик администрация түзүлүп,  Кара-Көл шаардык мамлекеттик администрация башчысы -  биринчи акими болуп Масиров Кошбай Масирович дайындалган. Масиров Кошбай Масирович Кара-Көл шаарынын социалдык-экономикалык өнүгүшүнө чоң салым кошкон. 

1996-жылдан  1999-жылга чейин шаардык мамлекеттик администрациясынын башчысы-акими болуп Бекбоев Турдуназир Бекбоевич иштеген. 

1999-жылдан 2001-жылдын июнь айына чейин Кутманова Зебикан Кутмановна шаардык мамлекеттик администрациясынын башчысы-акими болуп иштеген. Зебикан Кутмановна иштеген учурда шаардын жолдору, тротуарлары ремонттон өткөрүлүп, шаардын көрктөндүрүү, жашылдандыруусуна  өзгөчө көңүл бөлүп, чоң өзгөрүүлөрдү киргизген. Кыска мөөнөттүн ичинде Камчыбек Масиров атындагы  көчөсүндө Улуу Ата-Мекендик согушта курман болгондорго эстелик орнотулуп, коомдук бак уюштурулган. 

Кыргыз Республикасында жергиликтүү өзүн-өзү башкаруу институту түптөлгөнүнө байланыштуу Кыргыз Республикасынын Президентинин 2001-жылдын 2-майындагы №151 Указына ылайык областтык баш ийүүдөгү шаарларда мамлекеттик администрациялар мэрияга өзгөртүлгөн.   Жогоруда белгиленген Указга ылайык шаардын мэри шаардык кеңештин депутаттары  тарабынан шайланышы керектигинин негизинде 2001-жылы шаардык кеңештин кезексиз сессиясында Абытканова Рабшан Абыткановна шаардын мэри болуп шайланып, 2004-жылдын декабрь айына  чейин үзүрлүү иштеген . 

2004-жылдын декабрь айынан 2005 жылдын апрель айына чейин Кара-Көл шаарынын мэринин милдетин аткаруучу болуп  Бейшеев Турусбек Жумабаевич иштеген. 

2005-жылдын апрель айында шаардык кеңештин кезексиз сессиясында шаардын мэри болуп Молдомуров Толкунбек Темиркулович шайланып, 2009-жылдын сентябрь айына чейин жигердүү иштеген. 

2009-жылы шаардык кеңештин сессиясында шаардын мэри болуп Казакбаев Тагайбек Сапарбекович шайланып, 2010-жылдын апрель айына чейин үзүрлүү  кызмат кылган. Тагайбек Сапарбекович кыска мөөнөттө шаардын проблемалуу маселелерин изилдеп, так билип, шаардык кеңешке чыгарып, шаардын стратегиялык өнүгүү программасына киргизген. 

2010-жылдын апрель айынан 2011-жылдын август айына чейин шаардын мэринин милдетин аткаруучу болуп Еркеев Ильяз Марсович иштеп, депутаттар, шаардык кеңеш тарабынан көрсөтүлүп, 3 жолу мэр болуп шайланган. Еркеев Ильяз Марсович 2011-жылдан 2021-жылга чейин Кара-Көл шаарынын мэри болуп үзүрлүү эмгектенген.

2012-2016-жылдар аралыгында Койчиев Мамбет Дуйшалиевич Кара-Көл шаарынын мэри болуп эмгектенген.

2021-жыл июль айынан 2022-жыл июнь аралыгына Балташов Алмаз Шукуралиевич Кара-Көл шаарынын мэри болуп эмгектенген.

2022-жылдын июнь айынан баштап ушул күнгө чейин Кара-Көл шаарынын мэри болуп Конкобаев Талайбек Тажиматович үзүрлүү эмгектенип келет.