“Ишкердик субъекттерине текшерүүлөрдү жүргүзүүгө убактылуу тыюу салууну (мораторий) киргизүү жөнүндө” Жарлыкка өзгөртүү киргизилди

       Кыргыз Республикасынын Президенти Садыр Жапаров “Кыргыз Республикасынын Президентинин 2024-жылдын 9-январындагы “Ишкердик субъекттерине текшерүүлөрдү жүргүзүүгө убактылуу тыюу салууну (мораторий) киргизүү жөнүндө” ПЖ №1 Жарлыгына өзгөртүү киргизүү тууралуу” Жарлыкка кол койду. 

       Адамдардын өмүрүнүн, ден соолугунун коопсуздугун жана Кыргыз Республикасынын экономикалык туруктуулугун камсыз кылуу максатында, Кыргыз Республикасынын Конституциясынын 66, 71-беренелерине ылайык токтом кылынат:

       1. Кыргыз Республикасынын Президентинин 2024-жылдын 9-январындагы “Ишкердик субъекттерине текшерүүлөрдү жүргүзүүгө убактылуу тыюу салууну (мораторий) киргизүү жөнүндө” ПЖ №1 Жарлыгына төмөнкүдөй өзгөртүү киргизилсин:

       – 1-пункт төмөнкүдөй редакцияда баяндалсын:

       “1. Төмөнкүдөй жүзөгө ашырылуучу текшерүүлөрдү кошпогондо, 2024-жылдын 31-декабрына чейин укук коргоо жана ишкердик субъекттерине текшерүүлөрдү жүргүзүүгө укугу бар башка ыйгарым укуктуу органдар тарабынан жүргүзүлүүчү ишкердик субъекттерин текшерүүлөргө мораторий киргизилсин:

       1) ишкердик субъекти тарабынан Кыргыз Республикасынын мыйзамдарын бузган конкреттүү фактылар аныкталган учурда документтерди, материалдарды жана башка ырастоочу маалыматтарды тиркөө менен мамлекеттик органдардын кызмат адамдарынын суроо-талабы боюнча;

       2) салык кызматынын органдары;

       3) бажы органдары;

       4) тамак-аш коопсуздугу чөйрөсүндөгү мыйзамдарды сактоо маселелери боюнча текшерүүлөрдү;

    5) Кыргыз Республикасынын банк мыйзамдарына ылайык функцияларды жүзөгө ашыруучу Кыргыз Республикасынын Улуттук банкы.”.

   2. Кыргыз Республикасынын Башкы прокуратурасы Кыргыз Республикасынын Президентинин Администрациясы менен биргеликте эки жумалык мөөнөттө:

     – мамлекеттик органдар тарабынан ишкердик субъекттерине жүргүзүлгөн текшерүүлөрдү эсепке алуу системасына талдоо жүргүзсүн;

   – жүргүзүлгөн текшерүүлөрдүн натыйжалуулугун баалоо менен ишкердик субъекттерине карата текшерүүлөрдү эсепке алуу механизмин иштеп чыксын.

        3. Бул Жарлык расмий жарыяланган күндөн тартып күчүнө кирет.